Як узімку зберагчы пярэдняе шкло аўтамабіля ад трэшчын
- 10.12.2025, 13:23
Парады экспертаў.
Вадзіцелі «старой школы» ведаюць, што ў маразы пярэдняе шкло можа даць трэшчыну. У 2025 годзе гэта гучыць як «пужалка» з мінулага, аднак спецыялісты расказалі пра некалькі фактараў, праз якія гэта можа стаць рэальнасцю.
Сучасныя тэхналогіі дазваляюць захоўваць вокны і пярэдняе шкло непашкоджанымі нават у самых экстрэмальных умовах. Аднак усё ж ёсць нюансы, пра якія варта ведаць, каб пазбегнуць лішніх выдаткаў. Аўтамабільныя эксперты расказалі пра іх парталу «Твоя машина».
Чаму шкло можа даць трэшчыну
Першы фактар, які можа выклікаць нязначныя пашкоджанні нават самага якаснага шкла, — гэта рэзкі перапад тэмператур. Пераважна з гэтым сутыкаюцца вадзіцелі, якія пасля начнога марозу запускаюць рухавік і «пячку» на максімальную магутнасць, накіроўваючы цёплае паветра на шкло. Акрамя дасягнення галоўнай мэты — размарозіць яго, можна атрымаць пабочны эфект у выглядзе дробных пашкоджанняў.
«Пячку зімой для абагрэву вокнаў трэба выкарыстоўваць асцярожна. Найбольшую шкоду вы нанесяце, калі на шкле ўжо ёсць сколы і трэшчыны», — падкрэсліў майстар па рамонце шкла Мікалай Каваль.
Другі фактар рызыкі — гарачая вада. «Лайфхак» па размарозцы вокнаў пасля працяглай стаянкі на марозе з дапамогай гарачай вады працуе нават горш, чым пячка. Вадзіцелі часта ліюць на абледзянелае шкло ледзь не кіпятком, і ад такога стрэсу не ўратуе нават самая высокая трываласць.
Трэці і, магчыма, нечаканы фактар — занадта руплівая чыстка. Калі якаясьці часцінка лёду моцна прымерзла, можа з’явіцца спакуслівая, але падступная думка пазбавіцца ад яе з дапамогай скрабка. Аднак калі дадаць фізічнай сілы, гэта можа прывесці да з’яўлення трэшчыны або драпін. З-за холаду матэрыял становіцца больш далікатным, таму вялікіх высілкаў, каб пакінуць сур’ёзныя пашкоджанні, не трэба.
Як абараніць шкло
Пазбегнуць непрыемнасцяў са шклом з-за марозаў можна дзякуючы правільнаму алгарытму дзеянняў:
пачынаць абагрэў на сярэдняй магутнасці і плаўна перанакіроўваць патокі паветра на шкло;
набыць спецыяльныя размаражвальныя вадкасці, забыць пра металічныя скрабкі;
не ігнараваць дробныя пашкоджанні, бо яны могуць разрастацца.