У Беларусь ідзе «арктычны прарыў»

• 10.12.2025, 12:15

Сіноптыкі папярэджваюць пра рэзкае пахаладанне.

Сіноптыкі спрагназавалі Беларусі «вельмі хуткае» пахаладанне з-за «прарыву» халоднага паветра з Арктыкі. Тэрыторыя нашай краіны апынецца на яго перыферыі, але гэта не ўратуе ад рэзкага і даволі адчувальнага пахаладання.

Паводле прагнозу аўтараў Telegram-канала пра надвор'е @nadvorie, у Беларусі будзе цёпла да пятніцы, 12 снежня. Але ўжо ў ноч на суботу, 13 снежня, у наш рэгіён «прарвецца холад з Арктыкі». Асноўная халодная паветраная маса пройдзе крыху ўсходней ад Беларусі, і тым не менш як мінімум на пару дзён беларусаў чакае даволі кантрастная тэмпературная карціна: на захадзе краіны (то бок у Брэсцкай і Гродзенскай абласцях) тэмпература будзе трымацца ў плюсавым дыяпазоне 0..+3°С, тады як у крайніх усходніх раёнах слупкі тэрмометраў могуць апусціцца да -6..-9°С.

«Адзначу, што пахаладанне будзе адбывацца вельмі хутка. Пасля абеду ў пятніцу, пачынаючы з паўночных раёнаў, пойдзе дождж, які на ўсходзе Беларусі зменіцца мокрым снегам; тэмпература паветра з +5..+8°С да вечара апусціцца да 0°С, а да паўночы ўжо будзе адмоўнай», - абмалявалі карціну надвор'я да канца працоўнага тыдня спецыялісты.

Рэзкае пахаладанне будзе суправаджацца ўзмацненнем паўночнага ветру. Яго парывы будуць дасягаць 8–12 м/с, а ў пік праходжання халоднага фронту - да 12–16 м/с. Гэта будзе спрыяць, у тым ліку, утварэнню галалёдзіцы на дарогах, што варта ўлічыць аўтамабілістам, якія плануюць паездкі ў бліжэйшыя выходныя.