У Кувейце дзяржаўны служачы 10 гадоў не хадзіў на працу, атрымліваючы заробак

• 1.12.2025, 20:04

На яго рахунак за гэты час паступіла $340 тысяч.

У Кувейце дзяржаўны служачы атрымаў пяць гадоў турмы за тое, што цягам 10 гадоў не з'яўляўся на працоўным месцы, але працягваў атрымліваць заробак, піша Oddity Central.

Дзяржаўны служачы, імя якога мясцовыя СМІ не раскрываюць, атрымаў пяць гадоў пазбаўлення волі і абавязаны выплаціць штраф каля $1 млн. Паводле матэрыялаў справы, супрацоўнік лічыўся ў аддзеле грамадзянскіх паслуг, але пры гэтым не з'яўляўся на працоўным месцы каля дзесяці гадоў, працягваючы штомесяц атрымліваць заробак. На яго рахунак за гэты час паступіла $340 тысяч.

Раней два суды апраўдалі мужчыну, аднак касацыйны суд прызнаў доказы незаконнага ўзбагачэння і злоўжывання дзяржаўнымі рэсурсамі неаспрэчнымі і адмяніў папярэднія рашэнні.

Паводле СМІ, гэты вердыкт стаў адным з самых жорсткіх на фоне маштабнай кампаніі ўладаў Кувейта па барацьбе з карупцыяй і махлярствам у дзяржаўным сектары.