Трамп правядзе нараду па Венесуэле

• 1.12.2025, 19:13

Ужо сёння.

Прэзідэнт ЗША Дональд Трамп у панядзелак правядзе нараду ў Авальным кабінеце Белага дома па далейшых кроках у дачыненні да Венесуэлы. Пра гэта паведамляе тэлеканал CNN са спасылкай на крыніцы.

Па дадзеных тэлеканала, на сустрэчу запрошаныя кіраўнік Пентагона Піт Хегсет, старшыня Аб’яднанага камітэта начальнікаў штабоў генерал Дэн Кейн, дзяржаўны сакратар Марко Рубіо, кіраўніца апарату Белага дома С’юзі Уайлс і яе намеснік Стывен Мілер.

Некалькі дзён таму Трамп абвясціў пра закрыццё паветранай прасторы над Венесуэлай і вакол яе для авіякампаній, наркагандляроў і гандляроў людзьмі. Заява прагучала на фоне нарошчвання амерыканскага вайсковага групавання ў Карыбскім басейне.

Газета The Washington Post паведаміла, што амерыканскія ваенныя самалёты пастаянна вядуць патруляванне раёнаў вакол Венесуэлы. Амерыканскія СМІ неаднаразова заяўлялі, што Злучаныя Штаты могуць нанесці ўдар ужо зусім хутка.