Што адбываецца паміж адміністрацыяй Трампа і венесуэльскім рэжымам

• 1.12.2025, 17:54

ЗША фактычна закрылі неба над Венесуэлай.

Злучаныя Штаты наблізіліся да магчымых ваенных дзеянняў супраць венесуэльскага рэжыму. Амерыканскія ваенныя сілы сканцэнтраваныя ў Карыбскім басейне — гэта найбуйнейшае ўзмацненне ў зоне адказнасці SOUTHCOM з канца 1980-х. ЗША фактычна закрылі неба над Венесуэлай, а інфраструктура для аперацый разгорнутая як на ўласных тэрыторыях, так і ў краінах-саюзніках, уключаючы Трынідад і Табага і Дамініканскую Рэспубліку, піша National Review.

Хоць Белы дом не раскрывае афіцыйныя матывы, бягучая сітуацыя фармуецца на скрыжаванні некалькіх ключавых інтарэсаў адміністрацыі. Сярод іх — аднаўленне амерыканскага ўплыву ў Заходняй паўкулі, узмацненне бяспекі Панамскага канала, рэалізацыя абноўленай дактрыны Манро, барацьба з наркакартэлямі і незаконнай міграцыяй, а таксама дэманстрацыя ваеннай моцы ЗША пасля «страчанага аўтарытэту» папярэдніх гадоў.

Для Вашынгтона венесуэльскі рэжым — класічны прыклад зрастання дзяржавы і крымінальных структур. У адрозненне ад Мексікі, Каракас не робіць ніякіх крокаў насустрач ЗША ў барацьбе з картэлямі, што робіць краіну больш зручнай кропкай для пачатку ціску на «наркадзяржавы» рэгіёна. Прысутнасць у Венесуэле расійскіх, кітайскіх і іранскіх інтарэсаў узмацняе ўспрыманне пагрозы.

Вашынгтон таксама звязвае крызіс масавай міграцыі з палітыкай кіраўніка Венесуэлы Нікаласа Мадура: з краіны выехалі да чвэрці насельніцтва. Для ЗША стабілізацыя Венесуэлы — неабходная ўмова вяртання мільёнаў мігрантаў.

Сканцэнтраваўшы сілы каля берагоў краіны, адміністрацыя прэзідэнта ЗША Дональда Трампа сігналізуе, што гатовая абараняць стратэгічныя інтарэсы ЗША ў рэгіёне і рэагаваць на выклікі, якія непасрэдна адчуваюць амерыканскія грамадзяне.