Кітай зняў забарону на экспарт стратэгічных матэрыялаў у ЗША

• 9.11.2025, 17:45

Пекін дазволіў пастаўкі сыравіны для вытворчасці паўправаднікоў і ваеннай тэхнікі.

Кітай прыпыніў дзеянне забароны на экспарт некаторых матэрыялаў падвойнага прызначэння ў ЗША.

Пра гэта абвясціла ў нядзелю, 9 лістапада, Міністэрства гандлю Кітая, перадае Politico.

Гэты крок датычыцца экспарту галію, германію і сурмы, якія выкарыстоўваюцца ў вытворчасці сучасных паўправаднікоў, што прымяняюцца ў смартфонах і камп'ютарах.

Гэтыя матэрыялы таксама выкарыстоўваюцца ў ваенных тэхналогіях, такіх як радыёэлектронная барацьба і сістэмы назірання, а таксама ў ракетных сістэмах і боепрыпасах.

Пекін прыпыніў дзеянне ўведзенай летась меры, якая абмяжоўвала экспарт гэтых матэрыялаў і ўстанаўлівала больш строгія праверкі тавараў падвойнага прызначэння, уключаючы графіт.

Як заявілі ў МЗС Кітая, прыпыненне будзе дзейнічаць «з гэтага моманту да 27 лістапада 2026 года».