Брытанія тэрмінова ўзмацняе абарону Бельгіі

• 9.11.2025, 15:38

Пасля неаднаразовых уварванняў беспілотнікаў.

Вялікабрытанія тэрмінова накіроўвае ў Бельгію экспертаў і абарончае абсталяванне пасля серыі небяспечных інцыдэнтаў з беспілотнікамі, якія парушылі працу аэрапортаў і ваенных аб’ектаў.

Пра гэта паведамляе Reuters.

Галоўнакамандуючы Узброенымі сіламі Вялікабрытаніі Рычард Найтон адзначыў, што бельгійскі бок звярнуўся ў Лондан па дапамогу пасля таго, як серыя палётаў беспілотнікаў прымусіла часова закрываць аэрапорты, перанакіроўваць рэйсы і прыпыняць палёты.

Абсталяванне і асабовы склад ужо накіроўваюцца ў Бельгію. Якое менавіта абсталяванне адпраўляюць і якая колькасць вайскоўцаў задзейнічана — брытанскі бок пакуль не раскрывае.

Найтон таксама адзначыў, што пакуль невядома, хто стаіць за гэтымі палётамі беспілотнікаў. У той жа час ён нагадаў, што Расія на працягу апошніх гадоў актыўна выкарыстоўвае элементы «гібрыднай вайны», хоць Масква традыцыйна адмаўляе любую датычнасць.