У Вільнюсе зноў закрывалі аэрапорт з-за прылёту паветраных шароў

• 9.11.2025, 9:15

Рэйсы скасоўваліся або пераносіліся.

Вільнюскі аэрапорт вечарам 8 лістапада часова прыпыняў працу з-за пагрозы метэазондаў, піша Delfi.

У суботу ўвечары рух самалётаў у аэрапорце сталіцы Літвы быў спынены на гадзіну з 20:45 па мясцовым часе — з-за паветраных шароў, якія накіроўваліся ў бок аэрапорта. Рэйс з Рыгі вярнуўся назад, з Хельсінкі — скасаваны, з Катаніі — перанакіраваны ў Каўнас.

Аэрапорт аднавіў працу а 21:50.

«Міністэрства транспарту цэніць разуменне пасажыраў і авіяперавозчыкаў, дзякуем за супрацоўніцтва і цярпенне. Яшчэ раз падкрэсліваем: бяспека пасажыраў і грамадства — галоўны прыярытэт у авіяцыі», — заявіў саветнік міністра сувязі Літвы Лукас Пашкявічус.

Нагадаем, апошнім часам у Літве пачасціліся выпадкі прылёту метэазондаў з Беларусі, якія паралізуюць працу аэрапортаў. З-за гэтага ўлады краіны прынялі рашэнне часткова закрыць рух на мяжы да 30 лістапада.