Зяленскі прыняў тэрміновае рашэнне пасля абстрэлу Украіны
- 8.11.2025, 18:31
Кіеў працуе з партнёрамі, у прыватнасці з ЗША, над закупкай дадатковых сістэм СПА.
У суботу, 8 лістапада, пад атакай РФ апынуліся ўкраінскія гарады, энергетычная інфраструктура і цывільныя людзі. Украіна працуе з партнёрамі, у прыватнасці з ЗША, над закупкай дадатковых сістэм СПА. Пра гэта паведаміў прэзідэнт Украіны Уладзімір Зяленскі у відэазвароце.
«Удар быў масіраваны, шмат балістыкі — не менш за 25 балістычных ракет, таксама былі аэрабалістычныя і крылацатыя ракеты, яшчэ больш за 450 дронаў розных тыпаў. Вельмі нахабны, у многім дэманстратыўны ўдар», — заявіў кіраўнік Украіны.
Зяленскі падкрэсліў, што ўзровень міжнароднага ціску на Расію застаецца недастатковым, а любое паслабленне санкцый толькі стымулюе агрэсара да новых атак.
«Слабасць рэагавання на расійскую нахабнасць дае матыў Расіі працягваць вайну. Трэба столькі санкцый, столькі ціску, столькі падтрымкі жыцця, каб у Расіі не засталося сродкаў да існавання ва ўмовах вайны», — падкрэсліў ён.
Асноўнымі мэтамі ўдару сталі ўкраінскія гарады, энергетычная інфраструктура і мірныя жыхары. У Дніпры дрон трапіў у жылы дом, там загінулі як найменш трое чалавек. Таксама ёсць загінулы ў Харкаве. Зяленскі выказаў спачуванні родным і блізкім загінулых.
«Задзейнічаныя ўсе службы. З ночы я на сувязі з усімі адказнымі пасадавымі асобамі, і яны павінны максімальна аператыўна аднавіць пастаўкі электрычнасці, пастаўкі вады, цяпла ў тых гарадах, дзе былі пашкоджанні», — распавёў прэзідэнт Украіны.
Паводле яго слоў, за ноч украінскія Сілы абароны збілі больш за 400 дронаў і частку ракет. Зяленскі таксама падкрэсліў эфектыўнасць сістэм РЭБ.
«Частку ракет таксама ўдалося збіць, і вельмі складана, вядома, супрацьдзейнічаць балістычным і аэрабалістычным ракетам. Толькі нямногія сістэмы ў свеце могуць збіваць такія ракеты, эфектыўна збіваць, і, каб закрыць усю нашу тэрыторыю, патрэбна значна больш сістэм, значна больш ракет да гэтых сістэм. Мы працуем з партнёрамі, з Амерыкай, каб набыць дадатковыя «Пэтрыёты», вельмі разлічваем на падтрымку. Я дзякую кожнаму лідару, я дзякую кожнаму нашаму сябру ў Еўропе, у Амерыцы, у Азіі, хто нам дапамагае, хто спрабуе дапамагчы. Рашэнні будуць», — дадаў ён.