«Лукашэнка даў прызнальныя паказанні»

• 8.11.2025, 17:09

Ні памочнікі, ні спічрайтары не могуць спраўіцца з нечаканымі адкравеннямі кіраўніка.

І якія! Кажучы пра працоўныя адносіны кіраўнікоў і работнікаў, Лукашэнка публічна прызнаў, што сёння ў краіне не існуе ніякага падзелу ўладаў:

— Мы прынялі рашэнне і далі ўказанне суддзям. Калі дзесьці што — кіраўнік павінен мець нейкае права. Вось «нарад» — ідзі, працуй. Не зрабіў — з цябе кіраўнік скуру здзярэ. Калі здзярэ — ужо не паскардзішся. Пайдзеш у суд — а суддзям дадзеныя ўказанні, каб яны абапіраліся на гэты «нарад», які табе дадзены.

Цікава, што на апошняй па часе канферэнцыі Міжнароднай арганізацыі працы, калі гучалі заклікі вызваліць актывістаў і лідараў незалежных прафсаюзаў, якія цяпер знаходзяцца ў турмах Беларусі, прадстаўнікі ўладаў РБ з абурэннем казалі, што ў краіне — падзел уладаў, і ўлада не можа ўмешвацца ў рашэнне суда.

Як жа, урэшце, супрацоўнікі МЗС дрэнна думаюць пра ўладу! Што значыць «не можа ўмешвацца»? Яна можа ўсё!

Юрыст асацыяцыі «Салідарнасць» Леанід Судаленка у размове з «Салідарнасцю» адзначыў, што гэта прамое парушэнне канстытуцыйнага прынцыпу незалежнасці судовай улады:

— Па сутнасці, гэта «прызнальныя паказанні» Лукашэнкі, што ён дае ўказанні суддзям, як разглядаць працоўныя спрэчкі! Суддзя абавязаны кіравацца толькі законам і ўнутраным перакананнем, заснаваным на доказах, а не палітычнай воляй.

Работнікі часта загадзя слабей за наймальніка эканамічна і адміністрацыйна. Калі суд ператвараецца ў інструмент «выхавання» працоўных, ён перастае быць гарантам правоў і становіцца працягам выканаўчай вертыкалі.

На практыцы гэта прывядзе да таго, што работнікі яшчэ радзей будуць звяртацца ў суд, ведаючы, што рашэнне прадвызначана «ўказаннем зверху». А гэта — падрыў самой ідэі правасуддзя і сацыяльнай справядлівасці.