Трамп: Расія не жадае спыняць вайну ва Украіне

• 8.11.2025, 4:22

Прэзідэнт ЗША пракаментаваў адмену сустрэчы з Пуціным.

Прэзідэнт ЗША Дональд Трамп растлумачыў, што яго сустрэча з Уладзімірам Пуціным не адбылася ў Венгрыі з-за нежадання Расіі спыніць вайну супраць Украіны, аднак выказаў упэўненасць, што ўрэгуляваць яе ўдасца ў «нядалёкай будучыні».

Аб гэтым ён заявіў на прэс-канферэнцыі з Вікторам Орбанам у Белым доме.

На пытанне пра тое, ці адбудзецца сустрэча прэзідэнта ЗША з кіраўніком Расіі Пуціным у Венгрыі, Трамп заявіў, што «заўсёды ёсць шанец наведаць Будапешт».

«Орбан добра разумее Пуціна, добра яго ведае. І я адчуваю, што дазволю вам казаць тое, што вы думаеце. Але я думаю, што Віктар лічыць, што мы скончым гэтую вайну ў нядалёкай будучыні», — заявіў ён.

Дональд Трамп таксама падкрэсліў, што хацеў бы правесці сустрэчу з Пуціным менавіта ў Будапешце.

Прэм’ер-міністр Венгрыі Віктар Орбан заявіў, што краіна хоча далучыцца да «мірных намаганняў» ЗША па завяршэнні вайны Расіі супраць Украіны.

Прэзідэнт ЗША Трамп сказаў, што папярэдне запланаваная сустрэча з кіраўніком Расіі Пуціным у Будапешце была адмененая з-за таго, што Расія не жадае спыняць вайну.

Амерыканскі палітык абвінаваціў свайго папярэдніка Джо Байдэна ў тым, што ён «падштурхнуў» Расію да вайны.

«Вайна наносіць Расіі вялікую шкоду — страты дасягаюць 7 тысяч салдат за тыдзень. Таксама пытанне эканомікі. Мы не трацім грошы наўпрост — фінансаванне ідзе праз НАТА. Калі б я быў прэзідэнтам, гэтай вайны не было б, але цяпер мы павінны яе завяршыць... „Байдэн на самой справе падштурхоўваў да гэтай вайны, разумееце? Ніхто не верыць, але так проста атрымалася. А цяпер паглядзіце, што адбылося, паглядзіце, што адбылося з Украінай. Гэта значна меншая краіна, шмат людзей загінула“, — падкрэсліў Трамп.