Зяленскі пра «Тамагавк»: Вытворцы з радасцю прададуць іх Украіне

• 7.11.2025, 23:01

Але ўсё залежыць ад Трампа.

Амерыканскія вытворцы з радасцю прададуць Украіне далёкабійныя ракеты «Тамагавк». Аднак канчатковае рашэнне павінен прыняць прэзідэнт ЗША Дональд Трамп.

Пра гэта прэзідэнт Украіны Уладзімір Зяленскі заявіў падчас брыфінгу.

«Як я і казаў, мы працуем над гэтым пытаннем з партнёрамі — перш за ўсё з ЗША, з Белым домам і прэзідэнтам. Асобна працуем з вытворцамі», — сказаў Зяленскі.

Прэзідэнт адзначыў, што рашэнне аб пастаўках ракет «Тамагавк» — гэта асобны ціск на Расію, таму яно важнае для Украіны.

«Прэзідэнт Трамп не сказаў «не», і розныя інстытуты давалі нам станоўчыя сігналы адносна гэтага рашэння. Безумоўна, канчатковае рашэнне — за прэзідэнтам ЗША», — дадаў ён.

Зяленскі падкрэсліў, што амерыканскія вытворцы гатовыя аператыўна адрэагаваць на адабрэнне паставак.

«Мы абмяркоўвалі з вытворцамі. У выпадку станоўчага сігналу ад прэзідэнта Трампа яны з радасцю перададуць або прададуць адпаведныя сістэмы», — адзначыў ён.

Паводле слоў прэзідэнта, падчас перамоваў з амерыканскім бокам таксама абмяркоўвалася пытанне пастаўкі іншых далёкабійных сістэм.

«Нас цікавіць пакет розных рашэнняў. Для нас гэта стрымліўны пакет супраць расійскай агрэсіі і правільны адказ на ўдары па нашай грамадзянскай інфраструктуры, перш за ўсё энергетыцы. Мы працуем над гэтым пытаннем, і шанцы, што нам перададуць (такія сістэмы — рэд.), дакладна ёсць», — дадаў Зяленскі.