Сібіга: Супраць Украіны ваююць грамадзяне 36 краін Афрыкі
- 7.11.2025, 16:41
Міністр замежных спраў Украіны падкрэсліў, што лічба можа быць яшчэ большай.
Супраць Украіны ваююць па меншай меры 1436 грамадзян з 36 афрыканскіх краін. Хоць фактычная лічба баевікоў на баку арміі РФ можа быць большай.
Пра гэта заявіў міністр замежных спраў Украіны Андрэй Сібіга.
- Паводле наяўнай інфармацыі, па меншай меры 1436 грамадзян з 36 афрыканскіх краін цяпер ваююць у радох расійскай арміі, што ўварвалася ва Украіну. Гэта тыя, каго ідэнтыфікавалі, хоць фактычная лічба можа быць вышэйшая, - заявіў Сібіга.
Паводле яго слоў, Расія вербуе грамадзян афрыканскіх краін рознымі метадамі. Адзінім прапануюць грошы, іншых падманваюць, і яны не ўсведамляюць, пад чым падпісваюцца, або прымушаюць рабіць гэта пад ціскам. Падпісанне кантракта роўназначнае падпісанню смяротнага прысуду.
Замежныя грамадзяне ў расійскай арміі маюць сумны лёс. Большасць з іх адразу накіроўваюць на так званыя «мясныя штурмы», дзе іх хутка забіваюць. Расійскае камандаванне разумее, што за забітага замежніка адказнасці не будзе, таму да іх ставяцца як да другасортнага, разхаднага чалавечага матэрыялу.
Паводле слоў кіраўніка МЗС, большасць наймітаў не жывуць больш за месяц. Але ёсць два варыянты пазбегнуць такога лёсу.
Што рабіць, каб не стаць ахвярай вайны
Па-першае, не ісці ў рады расійскай арміі і не падпісваць ніякіх дакументаў з расійскімі ўладамі.
- Я заклікаю ўсе ўрады дзяржаў Афрыкі публічна папярэдзіць сваіх грамадзян ад уступлення ў расійскую акупацыйную армію. Удзел на баку Расіі ў яе захопніцкай вайне супраць Украіны з'яўляецца незаконным, амаральным і парушае Статут ААН і міжнароднае права, - дадаў Сібіга.
Па-другое, калі вас ужо адправілі на перадавую, шукайце любую магчымасць дэзерціраваць і здацца ў палон. Большасць замежных наймітаў, якія знаходзяцца ў украінскім палоне, сталі ваеннапалоннымі падчас свайго першага бою. Усе яны ўратавалі сабе жыццё.
- Расія спрабуе вербаваць людзей з многіх краін. Украіна будзе і надалей паведамляць пра рэгіёны і краіны, з якіх расійская акупацыйная армія вербуе замежных грамадзян, а таксама пра замежнікаў, якія трапляюць да нас у палон, - дадаў кіраўнік МЗС.