У Бельгіі трэці раз за тыдзень заўважылі дроны над буйнейшымі аэрапортамі, вайсковай базай з F-35 і АЭС

• 7.11.2025, 9:56

Паветраныя гавані Брусэля і Льежа прыпынілі працу.

Позна ўвечары 6 лістапада ў небе над Бельгіяй з'явіліся неапазнаныя беспілотнікі, з-за якіх два буйнейшыя аэрапорты краіны — Брусэля і Льежа — часова прыпынілі працу, паведамляе RTBF. Паводле дадзеных бельгійскай тэлерадыёкампаніі, паветраныя гавані не прымалі і не выпускалі самалёты прыблізна з 21:20 па мясцовым часе (23:20 па Мінску) да 22:00. Толькі ў аэрапорце Брусэля затрымаліся дзесяткі рэйсаў на вылет і прылёт. Таксама пралёт невядомых дронаў быў зафіксаваны ў раёне авіябазы Фларэн, куды нядаўна паступілі чатыры новыя знішчальнікі F-35. Акрамя таго, сем беспілотнікаў заўважылі паблізу атамнай электрастанцыі Дул у прыгарадзе Антвэрпэна, якая з'яўляецца другой паводле велічыні ў краіне, піша (Het Laatste Nieuws https://www.hln.be/nieuws/opnieuw-sprake-van-drones-in-buurt-van-brussels-airport-ook-meldingen-bij-nucleair-onderzoekscentrum-in-mol~a33d096f7/).

Неапазнаныя дроны ў паветранай прасторы Бельгіі з'яўляюцца ўжо трэці вечар запар, адзначае RTBF. На гэтым фоне ўлады краіны вырашылі да канца года адкрыць нацыянальны цэнтр па забеспячэнні паветранай бяспекі, які аб'яднае ўсе службы для барацьбы з лятаючымі апаратамі, заявіў міністр абароны Бельгіі Тэа Франкен. Ён таксама паведаміў пра планы набыць для бельгійскай арміі антыдронавае абсталяванне на суму больш за 500 тыс. еўра. На гэтыя грошы меркаваецца купіць радыёэлектронныя ружжы, прызначаныя для заглушэння сігналаў беспілотнікаў, а таксама сістэмы выяўлення, сачэння і суправаджэння дронаў, якія дазваляюць выяўляць не толькі самі апараты, але і іх аператараў.

Таксама Міністэрства абароны Бельгіі вырашыла актываваць чацвёрты артыкул статута НАТА аб кансультацыях па бяспецы. 6 лістапада генеральны сакратар Паўночнаатлантычнага альянсу Марк Рутэ правёў сустрэчу з Франкенам з нагоды пачашчэння выпадкаў выяўлення дронаў у паветранай прасторы краіны. Падчас перамоваў Рутэ пацвердзіў гатоўнасць альянсу аказаць Брусэлю падтрымку ў барацьбе з гэтай пагрозай.

Пасольства Расіі ў Бельгіі паведамляла, што бельгійскія ўлады не выстаўляюць «прамых абвінавачанняў на адрас Масквы», але не выключаюць, што яна можа мець дачыненне да інцыдэнтаў. Пры гэтым у дыппрадстаўніцтве адхілялі датычнасць Расіі да пралётаў беспілотнікаў над Бельгіяй.