Швецыя можа прафінансаваць частку здзелкі на 150 знішчальнікаў Gripen для Украіны

• 6.11.2025, 22:01

Пра гэта заявіў шведскі міністр абароны.

Швецыя можа прафінансаваць частку здзелкі па куплі Украінай да 150 знішчальнікаў Gripen E за кошт ваеннай дапамогі.

Пра гэта паведаміў агенцтву Reuters шведскі міністр абароны Пол Ёнсан.

Кіраўнік Мінабароны Швецыі заявіў, што фінансаванне рухаецца наперад, а Стакгольм цесна супрацоўнічае з украінскім бокам.

Ён адзначыў, што здольнасць Кіева фінансаваць самалёты са сваёй казны пасля вайны будзе цэнтральнай часткай пагаднення, але ёсць і іншыя спосабы.

«Мы можам разгледзець экспартныя крэдыты, замарожаныя расійскія актывы і нашу праграму дапамогі Украіне, якая складае 40 млрд кронаў у наступным годзе і 40 млрд у 2027 годзе», — кажа Ёнсан.

Ён паведаміў, што Швецыя прадставіла пагадненне лідарам краін «кааліцыі ахвотных», выказаўшы здагадку, што некаторыя з іх могуць быць гатовыя дапамагчы ў фінансаванні самалётаў.

«Магчыма, краіны, якія маюць субкампаненты сістэмы Gripen, будуць мець дадатковыя стымулы для фінансавання здзелкі», — сказаў Пол Ёнсан.

Reuters адзначае, што Gripen абсталяваны рухавікамі ад амерыканскай карпарацыі General Electric, а таксама многімі кампанентамі брытанскай вытворчасці.

Ёнсан заявіў, што Швецыя настойвае на перамовах з іншымі краінамі Еўрапейскага Саюза наконт выкарыстання €200 млрд замарожаных расійскіх актываў для фінансавання ваенных намаганняў Украіны.