Краіны G7 маюць намер усталяваць цэнавыя абмежаванні і на расійскія нафтапрадукты

• 6.11.2025, 17:41

Кааліцыя імкнецца пазбавіць Маскву даходаў.

Краіны «Вялікай сямёркі» (G7) маюць намер у лютым усталяваць два цэнавыя абмежаванні на расійскія нафтапрадукты: адно — для прадуктаў, якімі гандлююць з прэміяй да кошту сырой нафты, а другое — для прадуктаў, якімі гандлююць са зніжкай.

Пра гэта піша Reuters са спасылкай на чыноўніка G7.

«Кааліцыя, у склад якой уваходзяць Аўстралія, Канада, Японія і Злучаныя Штаты, а таксама 27 краін Еўрапейскага Саюза, увяла з 5 снежня абмежаванне цаны на расійскую нафту ў памеры 60 долараў за барэль, у дадатак да эмбарга ЕС на імпарт расійскай сырой нафты марскім транспартам», — піша Reuters. — «З 5 лютага кааліцыя таксама ўвядзе абмежаванні цэн на расійскія тавары, такія як дызельнае паліва, керасін і мазут, каб яшчэ больш скараціць даходы Масквы ад экспарту энергарэсурсаў і яе здольнасць фінансаваць уварванне ва Украіну».

Пры гэтым усталяванне ліміту цэн на нафтапрадукты з’яўляецца больш складаным, чым усталяванне цэнавага ліміту толькі на сырую нафту, бо існуе шмат нафтапрадуктаў, і іх кошт часта залежыць ад таго, дзе іх набываюць, а не ад таго, дзе яны вырабляюцца, сказаў чыноўнік.

Прыводзячы прыклад дызельнага паліва і керасіну, якімі звычайна гандлююць з прэміяй да сырой нафты, у той час як мазут звычайна прадаецца са зніжкай, ён сказаў, што менавіта таму G7 разглядае два абмежаванні цэн.

«Хаця кааліцыя імкнецца пазбавіць Маскву даходаў, яна хоча пазбегнуць парушэння балансу на сусветным энергетычным рынку і павышэння цэн для спажыўцоў у сваіх краінах», — гаворыцца ў публікацыі, — «Міжнародныя цэны на нафту крыху выраслі пасля ўвядзення 5 снежня цэнавага абмежавання з-за асцярогі зрыву паставак, але з таго часу зноў знізіліся. Расія паабяцала не прадаваць нафту краінам, якія ўвялі абмежаванні, што для Еўропы можа быць асабліва складаным у выпадку з нафтапрадуктамі».