Лукашэнка пагражае ўвесці платныя медыцынскія паслугі

• 6.11.2025, 15:10

Пакуль што для беларусаў, якія жывуць за мяжой.

Лукашэнка абураны тым, што беларусы, якія выехалі за мяжу, нібыта прыязджаюць на радзіму, каб бясплатна атрымліваць медыцынскія паслугі.

«У нас у Польшчу з'ехала 10–12 тыс. чалавек. Хоць, кажуць, мільён з'ехаў. Не важна, колькі. А зубок лячыць яны едуць у Гродна. А чаму? Бо тут бясплатна. Бясплатна нічога не бывае. Гэта бюджэт — дзяржава плаціць за вас. Таму і тут будзе прынята рашэнне», — сказаў дыктатар.

Лукашэнка заявіў, што не перашкаджае выезду насельніцтва за мяжу на заробкі, асабліва ў Расію, але патрабуе, каб тыя, што з'ехалі, аплачвалі медыцынскія паслугі ў Беларусі.

«Ты, атрымаўшы добрыя грошы, сюды прыедзь, заплаці. Мы табе і зуб выцягнем, што заўгодна. Але толькі за твой кошт», — заявіў ён.

Адзначым, раней сайт Charter97.org пісаў, што Мінздароўя прапрацоўвае пытанне абмежавання магчымасцей па бясплатным лячэнні для не занятых у эканоміцы («дармаедаў»), а таксама грамадзян Беларусі, якія пастаянна пражываюць за мяжой. Шмат паслуг для іх хочуць зрабіць платнымі, у тым ліку планавыя аперацыі.