У ЗША знайшлі «чорныя скрыні» самалёта UPS, які загарэўся пры ўзлёце

• 6.11.2025, 8:23

Яны ўжо перададзены на аналіз спецыялістам.

Следчыя выявілі бартавыя самапісцы грузавога самалёта UPS, які разбіўся паблізу горада Луісвіла ў штаце Кентукі. У выніку аварыі загінулі прынамсі 12 чалавек.

Пра гэта паведамляюць (Reuters https://www.reuters.com/business/aerospace-defense/death-toll-louisville-ups-plane-crash-rises-9-2025-11-05/) і Associated Press.

Федэральнае ўпраўленне па бяспецы на транспарце ЗША (NTSB) пацвердзіла, што знойдзены абодва самапісцы — рэгістратар палётных дадзеных і перамоваў экіпажа. Яны ўжо перададзены на аналіз спецыялістам.

Пасля атрымання дазволу на ўзлёт у левым крыле самалёта ўзнік вялікі пажар, паведаміў член Нацыянальнага савета па бяспецы на транспарце, які ўзначальвае расследаванне, Тодд Інман.

Цяпер NTSB паспрабуе вызначыць, што стала прычынай пажару і чаму адпаў рухавік. Магчыма, следчым спатрэбіцца больш за год, каб адказаць на гэтыя пытанні.

Самалёт набраў дастатковую вышыню, каб пераадолець агароджу ў канцы ўзлётна-пасадачнай паласы, перад тым як разбіцца недалёка ад Міжнароднага аэрапорта імя Мухамеда Алі ў Луісвіле, паведаміў Інман.

Ён сказаў, што на відэа службы бяспекі аэрапорта бачна, як левы рухавік адрываецца ад крыла падчас разбегу.

Па словах Інмана, былі выняты галасавы рэгістратар і рэгістратар дадзеных кабіны пілотаў, а рухавік быў выяўлены на аэрадроме. Увогуле, абломкі разляцеліся на вялікую адлегласць.

Улады Луісвіла паведамілі, што аэрапорт ужо аднавіў працу, аднак узлётна-пасадачная паласа застанецца закрытай яшчэ каля 10 дзён.

Грузавы самалёт UPS разбіўся каля 17:15 па мясцовым часе, вылятаючы з Міжнароднага аэрапорта імя Мухамеда Алі ў Луісвіле ў Ганалулу.