ЗША правялі выпрабавальны пуск міжкантынентальнай балістычнай ракеты Minuteman III

• 5.11.2025, 19:42

Ракета здольная несці ядзерныя боегалоўкі на адлегласць больш за 12 тысяч кіламетраў.

Амерыканскія вайскоўцы правялі выпрабавальны пуск міжкантынентальнай балістычнай ракеты Minuteman III.

Пра гэта паведамляе прэс-служба авіябазы Вандэнберг.

Ракету Minuteman III без баявой часткі запусцілі з базы касмічных сіл Вандэнберг у Каліфорніі 5 лістапада 2025 года. Выпрабаванні былі накіраваныя на праверку надзейнасці, баявой гатоўнасці і дакладнасці сістэмы МБР, якая з’яўляецца ключавым элементам нацыянальнай абароны ЗША.

МБР пераадолела каля 4200 міль (прыблізна 6750 кіламетраў), даляцеўшы да выпрабавальнага палігону Рональда Рэйгана на атоле Кваджалейн у Рэспубліцы Маршалавых Астравоў у Ціхім акіяне.

Спецыялісты Камандавання касмічнай і супрацьракетнай абароны Арміі ЗША сабралі важныя дадзеныя з дапамогай радараў, аптычных датчыкаў і тэлеметрычных сістэм для аналізу характарыстык палёту.

Варта адзначыць, што Minuteman III — гэта амерыканская міжкантынентальная балістычная ракета, якая стаіць на ўзбраенні з пачатку 1970-х гадоў і з’яўляецца ключавым элементам ядзернай трыяды ЗША.

Яна здольная несці ядзерныя боегалоўкі на адлегласць больш за 12 тысяч кіламетраў і паражаць мэты з высокай дакладнасцю.

Нягледзячы на свой узрост, Minuteman III пастаянна мадэрнізуецца: абнаўляюцца сістэмы кіравання, навядзення і бяспекі.