Літва прапанавала ЕС новыя санкцыі супраць рэжыму Лукашэнкі

• 5.11.2025, 17:30

Пакет абмежаванняў можа спрацаваць яшчэ да зацвярджэння.

Афіцыйны Вільнюс прадставіў свае прапановы адносна таго, як павінны выглядаць новыя санкцыі, якія прымяняюцца да Беларусі на міжнародным узроўні, — заявіў міністр замежных спраў Літвы Кястуціс Будрыс.

«Мы прадставілі свой пакет прапаноў, які змяшчае як канкрэтныя фармулёўкі, так і эфект, — цытуе кіраўніка МЗС навінавы партал Delfi. — Літва — не пачаткоўка ў тэме санкцый. І пакеты мер, і прадстаўленыя намі аргументы ўспрымаюцца ўсур'ёз. Нам давяраюць».

Паводле службоўца, Вільнюс спадзяецца, што, «магчыма, падрыхтоўваны пакет паўплывае яшчэ да таго, як будзе прынята канчатковае рашэнне аб санкцыях».

Не выключана, лічыць Будрыс, што рэжым Аляксандра Лукашэнкі «зробіць высновы» перад тым, як будуць ужытыя «усе гэтыя меры».

Якіх сфер тычацца прапановы адносна новых абмежавальных мер, не ўдакладняецца.

У канцы кастрычніка кіраўнік літоўскай дыпламатыі заявіў, што спадзяецца на прагрэс Еўрапейскай камісіі ў пытанні санкцый супраць Беларусі да канца лістапада.