П'яны «СВАшнік» з нажом напаў на наведвальнікаў мінскага кафэ?

• 5.11.2025, 15:10

Мужчына хваліўся, што «адразаў людзям галовы».

У абедзены час 34‑гадовы мінчанін зайшоў у кафэ на пр. Рокоссовского. Праглядаючы меню, ён пачуў, як адзін відавочна п'яны наведвальнік нецэнзурна выказваецца ў яго адрас, але праігнараваў гэта. Пасля незнаёмец прапанаваў выйсці на вуліцу пагаварыць, і ў гэты момант мужчына ўбачыў, што ў таго на паясе вісіць нож у ножнах, а пад рамянём — засунуты прадмет, падобны да пісталета. Ён спалохаўся і прапанаваў пагаварыць за столікам, паведамляюць «Мінск-Навіны».

П'яны хлопец пагадзіўся і пачаў распавядаць, што ўдзельнічаў у спецаперацыі на тэрыторыі Украіны і адразаў людзям галовы.

Раптам ён выхапіў нож і пачаў пагражаць мінчаніну, размахваючы ім каля яго твару і патрабуючы выйсці на вуліцу. Мужчына, стараючыся захоўваць спакой, пагадзіўся, але пры ўмове, што зламыснік выкіне нож у урну.

Незнаёмец паслухаўся.

Ля ўваходу ў кафэ ён зноў пачаў пагражаць мужчыне расправай і раптам вярнуўся ў завядзенне — верагодна, каб забраць нож. Скарыстаўшы момант, мінчанін сеў у свой аўтамабіль і паведаміў пра здарэнне ў міліцыю.

29‑гадовага хлопца затрымалі.

— Абвінавачаны раней да крымінальнай адказнасці не прыцягваўся, — распавёў намеснік пракурора Ленінскага раёна Аляксандр Мазанік.

Хлопца абвінавачваюць у асабліва злосным хуліганстве. Ці сапраўды ён удзельнічаў у вайне ва Украіне, выданне не ўдакладняе, але і не абвяргае.