Беларускі бізнесмен аднаўляе палац Любамірскіх у Беластоку

• 5.11.2025, 13:47

Інвестар плануе ператварыць старадаўнюю рэзідэнцыю ў сучасны гатэль.

Беларускі бізнесмен Аляксей Навіцкі, які з’яўляецца ўладальнікам беластоцкай газахімічнай кампаніі WGT Group, пачаў рэканструкцыю гістарычнай славутасці — Палаца Любамірскіх у раёне Дойліды ў Беластоку, піша эканамічны аглядальнік Вадзім Сеховіч.

У абноўленым будынку будуць размешчаныя гатэль і рэстаран.

WGT Group стала ўладальнікам палаца ў лістападзе 2020 года, выкупіўшы яго на аўкцыёне за 6,5 млн злотых (пачатковы кошт быў 4,2 млн злотых).

Актыўная рэканструкцыя пачалася вясной 2025 года.

Палац Любамірскіх — адзін з знакавых месцаў адміністрацыйнага цэнтра Падляскага ваяводства, рэкамендаваны для наведвання турыстычны аб’ект. Яго ў 1850‑я гады, у тады яшчэ вёсцы Дойліды, узвёў расійскі барон Аляксандр Крузенштэрн — сын вядомага мараплаўца, адмірала Івана Крузенштэрна. Ад яго дачкі і спадчынніцы Соф’і фон Рудыгер палац перайшоў у ўласнасць князю Ежы Рафалу Любамірскаму.

Падчас нямецкай акупацыі Польшчы ў 1940‑я ў ім знаходзілася рэзідэнцыя гауляйтара Усходняй Прусіі, рэйхскамісара Украіны і начальніка грамадзянскай адміністрацыі акругі Беласток Эрыха Коха.

У часы ПНР палац заняў сельскагаспадарчы тэхнікум, а ўжо ў сучаснай Польшчы гарадскія ўлады ў 1990‑я прадалі яго разам з прылеглым паркам плошчай 26 гектараў усяго за 160 тыс. злотых прыватнай Wyzsza Szkola Administracji Publicznej im. Stanislawa Staszica.

Установа адукацыі, у рэканструкцыю і пашырэнне якой былі прыцягнуты еўрапейскія сродкі, квітнела пры яе першай уладальніцы — прафесарцы, былой міністарцы культуры і шматгадовай еўрадэпутатцы Барбары Кудрыцкай. Але з 2010‑х пачала занепадаць. У 2016 г. новым уладальнікам палаца Любамірскіх стала кампанія PQE. Праўда, у 2019‑м яна збанкрутавала.

Кампанія WGT Group належыць беларусу Аляксею Навіцкаму і грамадзянцы Польшчы Моніцы Каміле Гуль. WGT Group, заснаваная ў 2017 годзе, уваходзіць у лік вядучых інвестыцыйных праектаў беларусаў у Польшчы.