КНДР адправіла ў Расію яшчэ 5000 ваеннаслужачых

• 5.11.2025, 11:19

Разведцы Паўднёвай Карэі сталі вядомыя падрабязнасці.

Паўночная Карэя з пачатку восені перакінула ў Расію 5000 ваеннаслужачых-будаўнікоў для дапамогі ў «аднаўленні інфраструктуры». Пра гэта са спасылкай на разведку Паўднёвай Карэі ў аўторак паведаміў дэпутат парламента краіны Лі Сон Гвон, перадае Euractiv. «З верасня каля 5000 паўночнакарэйскіх вайскоўцаў-будаўнікоў паэтапна перакідваюцца ў Расію і, як чакаецца, будуць мабілізаваныя для аднаўлення інфраструктуры», — сказаў дэпутат.

Паводле яго, паўднёвакарэйская разведка таксама выявіла «прыкметы» навучання і адбору персаналу ў межах падрыхтоўкі «да дадатковых перакідкаў войскаў». Цяпер каля расійска-ўкраінскай мяжы, паводле ацэнак спецслужбаў, сканцэнтраваныя каля 10 000 паўночнакарэйскіх ваеннаслужачых, сказаў Лі. Пры гэтым, паводле ацэнак Сеула, у вайне ва Украіне загінулі прынамсі 600 паўночнакарэйскіх салдат, яшчэ тысячы атрымалі раненні.

Раней разведслужбы Паўднёвай Карэі і Захаду паведамлялі, што, паводле іхніх даных, Пхеньян у 2024 годзе накіраваў ваяваць супраць Украіны каля 10 000 сваіх ваеннаслужачых. У верасні 2025-га паўднёвакарэйская разведка ацэньвала колькасць загінулых ва Украіне паўночнакарэйскіх салдат, перакінутых для падтрымкі Узброеных Сіл РФ, прыкладна ў 2 000 чалавек, нагадвала AFP.