На мяжы з Польшчай растуць чаргі з аўтамабіляў

• 5.11.2025, 11:17

Выезду з краіны чакаюць 2 845 аўтамабіляў.

Чаргі на выезд з Беларусі ў Польшчу працягваюць расці. Пра гэта сведчаць абноўленыя даныя Дзяржаўнага памежнага камітэта.

Па стане на 10:00 5 лістапада ў пункце пропуску «Брэст» (Тэрэспаль) выезду чакалі 2 845 легкавых аўтамабіляў і 165 аўтобусаў. Для параўнання, суткамі раней гэтыя паказчыкі складалі 2 660 і 150 адпаведна.

На грузавым напрамку «Казловічы – Кукурыкі» ў чарзе знаходзіліся 1 640 грузавікоў, што трохі менш, чым днём раней (1 770).

На латвійскім напрамку, у пункце «Грыгораўшчына – Патэрніекі», на паказаны час зафіксавана 390 грузавікоў супраць 450 суткамі раней. Легкавыя аўтамабілі і аўтобусы тут не назіраліся ні раніцай 5 лістапада, ні ў той жа час 4-га.

Нагадаем, Літва закрыла на месяц пункты пропуску Мядзінінкай (Каменны Лог) і Шальчынінкай (Беняконі) на мяжы з Беларуссю. Абмежаванні будуць дзейнічаць да 24:00 30 лістапада з магчымасцю іх падаўжэння.