Украінскія ваяры знішчылі рэдкі Т-80БВМ расіян на памежжы Дняпрапятроўшчыны

• 4.11.2025, 21:33

Відэа.

Байцы 413-га палка Сіл беспілотных сістэм (СБС) «Рэйд» паспяхова знішчылі новы і рэдкі від штурмавой тэхнікі арміі РФ на мяжы Дняпрапятроўскай і Данецкай абласцей. Гэты ўдалы ўдар сарваў планы ворага па прасоўванні ўглыб украінскай тэрыторыі.

Пра гэта паведаміў вайсковец 413-га палка СБС «Рэйд», эксперт па ўзбраеннях Defense Express Іван Кірычэўскі.

Па ягоных словах, эфектыўная праца байцоў «Рэйда» не дала «браняванаму кулаку ворага зайсці ўглыб тэрыторыі Дняпрапятроўскай вобласці».

«Калі б ваявая тэхніка там прайшла, крэмлёўская прапаганда атрымала б падставу казаць пра «наступ танкаў на Дняпрапятроўскую вобласць» з усімі вынікаючымі наступствамі. Але эфектыўная праца байцоў «Рэйда» такі план ворага сарвала», — адзначыў эксперт.

Знішчаная тэхніка аказалася рэдкай для арміі РФ мадэрнізацыяй — танк Т-80БВМ, абсталяваны супрацьміннымі траламі, сродкамі радыёэлектроннай барацьбы (РЭБ) і новым тыпам антыдроннай абароны з арматуры.

«Сапраўды, усяго некалькі дзён таму стала вядома пра з’яўленне ў расіян гэтай «вундэрвафэ» — Т-80БВМ са супрацьміннымі траламі, сродкамі РЭБ і новым тыпам антыдроннай абароны з арматуры», — падкрэсліў Кірычэўскі.

Ён дадаў, што такі «апгрэйд» з’яўляецца часткай варажога «асобнага фетышу на тое, каб рабіць свае АБТ максімальна складанай мэтай для нашых ударных БПЛА».

Эксперт адзначыў, што Т-80 — рэдкае сямейства танкаў для расіян. З-за вычарпання запасаў і праблем з вытворчасцю кожны такі танк «стаў на вагу золата» і размеркоўваецца выключна ў «элітныя» часткі.

Акрамя таго, ён адзначыў, што чым больш расіяне будуць «апгрэйдзіць» свае танкі, «тым меншай будзе іх манеўранасць і тым хутчэй будзе вычэрпвацца рэсурс. У выніку страты і няўдачы войскаў РФ будуць яшчэ большымі».