Пуцін назваў уварванне ва Украіну «абаронай суверэнітэту» Расіі, як у 1612 годзе

• 4.11.2025, 20:05

Дыктатар РФ згадаў пра ўзяцце Масквы прадкамі беларусаў.

Расія, якая напала на Украіну і вядзе супраць яе ўжо амаль чатыры гады поўнамаштабную вайну, нібыта займаецца забеспячэннем незалежнасці краіны і абаронай нацыянальнай чэсці, вынікае з заявы дыктатара РФ Уладзіміра Пуціна, які параўнаў уварванне з барацьбой жыхароў Маскоўскай дзяржавы супраць прадкаў беларусаў падчас Смутнага часу XVII стагоддзя. «Сёння, захоўваючы гэтыя традыцыі, мы мірнай, стваральнай і ратнай працай абараняем суверэнітэт, чэсць і годнасць роднай Расіі», — сказаў кіраўнік 4 лістапада падчас цырымоніі ўручэння дзяржаўных узнагарод і прэмій за ўмацаванне адзінства расійскай нацыі, прымеркаванай да Дня народнага адзінства.

Пуцін таксама заявіў, што барацьба народнага апалчэння супраць «польскіх войскаў» у 1612 годзе дазволіла адстаяць «дзяржаўныя ўстоі» і «свяшчэннае права трымацца ўласных каранёў і маральных апор». Па словах узурпатара, расіяне ўмеюць «змыкаць шэрагі» ў умовах «глабальных выклікаў і пагроз». «Нягледзячы на ўсе складанасці, праблемы і трагедыі сённяшняга дня, а іх, на жаль, дастаткова, <�…> мы імкнёмся да дружбы, супрацоўніцтва з усімі, не толькі суседнімі, але і з усімі народамі на Зямлі», — запэўніў Пуцін, дадаўшы, што з Масквы будуць ісці «менавіта такія імпульсы».