Toyota ўразіла свет крэслам-робатам

• 4.11.2025, 16:56

Прылада ходзіць, падымаецца па лесвіцах і складаецца.

На аўтасалоне Japan Mobility Show 2025 кампанія Toyota прадставіла інавацыйную прыладу пад назвай «Walk Me» — аўтаномнае крэсло на чатырох нагах, якое здольнае хадзіць, падымацца па прыступках і складацца да кампактных памераў, піша Interesting Engineering (пераклад — сайт Charter97.org).

У адрозненне ад традыцыйных інвалідных вазкоў, «Walk Me» не мае колаў — замест іх выкарыстоўваюцца чатыры робатызаваныя «ногі», кожная з якіх згінаецца, падымаецца і адаптуецца да паверхні. Такая канструкцыя дазваляе крэслу пераадольваць няроўнасці, гравій і лесвіцы.

Інжынеры натхняліся рухамі жывёл — коз і крабаў. Дзякуючы гэтаму Walk Me можа рухацца плыўна і ўстойліва нават на складаных паверхнях. Сэнсары скануюць прастору, дапамагаючы крэслу абыходзіць перашкоды і захоўваць раўнавагу.

Крэсло абсталявана сістэмай галасавога кіравання: карыстальнікі могуць падаваць каманды кшталту «на кухню» або «хутчэй». Акрамя таго, убудаваны дысплей паказвае ўзровень зараду батарэі і пройдзеную дыстанцыю.

Эрганамічнае сядзенне падладжваецца пад цела, а бакавыя ручкі дазваляюць кіраваць рухам уручную. Акумулятар, убудаваны ў заднюю частку крэсла, забяспечвае працу прылады цягам усяго дня, а зарадка адбываецца ад звычайнай разеткі.

Адна з ключавых асаблівасцяў — магчымасць складання: за 30 секунд крэсла ператвараецца ў кампактны блок, які лёгка змесціцца ў багажнік аўтамабіля.

«Walk Me» — гэта крок Toyota ў будучыню персанальнай мабільнасці. Кампанія імкнецца аб’яднаць робататэхніку і дызайн, арыентаваны на чалавека, каб стварыць тэхналогіі, якія даруюць людзям з абмежаванай рухомасцю не проста рух, а сапраўдную свабоду.