The Telegraph: Германія ўзбройваецца да зубоў

• 4.11.2025, 12:37

Берлін рыхтуецца да супрацьстаяння з Расіяй.

Пасля дзесяцігоддзяў пацыфізму Германія імкліва вяртаецца да ролі ваеннай звышдзяржавы Еўропы. Пад кіраўніцтвам канцлера Фрыдрыха Мерца краіна пачала маштабнае пераўзбраенне, маючы намер стварыць наймацнейшую армію на кантыненце, піша The Telegraph (пераклад — сайт Charter97.org).

У 2024 годзе Германія выдаткавала больш за 50 млрд еўра на абарону і плануе ўкласці яшчэ 377 млрд у найбліжэйшыя гады. Гэтыя сродкі пойдуць на закупку танкаў Leopard 2, знішчальнікаў F-35, артылерыі, падводных лодак і сістэм СПА. Ужо замоўлена больш за сотню новых танкаў, шэсць фрэгатаў і каля тысячы ракет Patriot.

Мерц правёў праз Бундэстаг рэформу, скасаваўшы «даўгавое тармажэнне» для ваенных выдаткаў. Цяпер Германія можа займаць неабмежаваныя сумы на абарону, пры гэтым яе доўг застаецца адным з самых нізкіх у Еўропе — каля 62% ВУП.

Берлін таксама плануе вярнуць вайсковую павіннасць: колькасць Бундэсвера павінна вырасці з 185 да 260 тысяч вайскоўцаў. Паводле слоў экспертаў, Германія мае намер узяць на сябе ключавую ролю ў абароне ўсходняга флангу НАТА і падтрымцы Польшчы ў выпадку агрэсіі Расіі.

Аднак аналітыкі папярэджваюць: нягледзячы на рэкордныя выдаткі, нямецкае войска ўсё яшчэ залежыць ад амерыканскіх тэхналогій і адстае ў распрацоўцы сучасных дронаў і ракет. Акрамя таго, рост папулярнасці правай партыі AfD, якая выступае супраць НАТА, можа ўскладніць ваенныя рэформы.

Тым не менш, у Берліне ўпэўненыя — эпоха ілюзій пра вечны мір скончылася. Германія вяртаецца ў шэрагі вядучых ваенных дзяржаў Еўропы, імкнучыся стаць апорай НАТА і стрымаць амбіцыі Пуціна.