Літва перахапіла дрон з Беларусі

• 4.11.2025, 8:25

Да дрона быў прымацаваны пакунак з 750 пачкамі беларускіх цыгарэт.

У Шальчынінкскім раёне, які мяжуе з Беларуссю, перахоплены беспілотны лятальны апарат з кантрабандай, паведамляе Служба аховы дзяржаўнай мяжы Літвы (САДМЛ).

Да дрона быў прымацаваны пакунак з 750 пачкамі беларускіх цыгарэт коштам амаль 4 тыс. еўра, адзначае памежная служба.

Паводле дадзеных САДМЛ, з пачатку года ў Літве перахоплены 51 дрон з беларускімі цыгарэтамі. За 2024 год літоўскія памежнікі перахапілі 54 такія БПЛА.

Нагадаем, усе пункты пропуску на беларуска-літоўскай мяжы будуць закрытыя на працягу месяца — такое рашэнне прынята на пасяджэнні ўрада балтыйскай краіны 29 кастрычніка ў сувязі з масавымі залётамі з Беларусі метэаразондаў з кантрабанднымі цыгарэтамі. Магчыма падаўжэнне абмежаванняў пасля 30 лістапада.