Аэрапорт Вільнюса закрылі з-за паветраных шараў з Беларусі

• 30.11.2025, 19:57

Абмежаванні будуць дзейнічаць да 21:00 па мясцовым часе.

Увечары ў нядзелю, 30 лістапада, Вільнюскі аэрапорт перастаў прымаць і адпраўляць рэйсы — паводле папярэдняй інфармацыі, з-за чарговага ўварвання метэазондаў з кантрабандай з боку Беларусі.

«Паведамляем, што 30 лістапада а 18:09 былі ўведзены часовыя абмежаванні паветранай прасторы над аэрапортам Вільнюса. Абмежаванні будуць дзейнічаць да 21:00 (22:00 па Мінску)», — праінфармавала прэс-служба аэрапорта.

Апошні раз аналагічная праблема ўзнікла літаральна днямі — увечары ў чацвер, 27 лістапада. Аэрапорт не працаваў усю ноч.