Беларускіх ІП паставілі перад выбарам

• 30.11.2025, 17:26

Негатыўныя наступствы ўжо адчуваюцца.

У Беларусі працягвае скарачацца колькасць індывідуальных прадпрымальнікаў (ІП). Гэта вынікае з дадзеных Белстата. «Зеркало» расказвае падрабязнасці.

На 1 лістапада ў Беларусі налічвалася 214 945 індывідуальных прадпрымальнікаў. Гэта на 11% менш, чым годам раней.

Калі параўноўваць сітуацыю па рэгіёнах, то найбольш за гэты перыяд страціла па ІП Мінская вобласць — 17,3%. У Гродзенскай паказчык скараціўся на 13,3%, а ў Мінску — на 10,5%. Пры гэтым ні ў адным з рэгіёнаў не зафіксавалі росту колькасці ІП.

З галін за апошні год больш за ўсё ІП страціла галіна «інфармацыя і сувязь» — 24,9% (лістапад 2025-га да аналагічнага месяца 2024-га).

Нагадаем, улады з 1 кастрычніка мінулага года спынілі рэгістрацыю ІП па асобных відах дзейнасці. Пры гэтым некаторым з дзейных прадпрымальнікаў трэба да канца 2025-га або перайсці ў юрыдычную асобу, або закрыцца.

Тым часам ІП працягваюць саступаць рынак гандлёвым сеткам. Так, рознічны тавараабарот індывідуальных прадпрымальнікаў і фізасоб у студзені—кастрычніку гэтага года склаў 3 млрд 723,4 млн рублёў. Гэта сума на 4% меншая ў супастаўных цэнах, чым за аналагічны перыяд 2024-га.

На ІП і фізасоб у студзені—кастрычніку бягучага года прыпадала 4,4% рознічнага тавараабароту, астатняе — на арганізацыі. Годам раней гэты паказчык быў на ўзроўні 5,1%.