«Адна з самых паспяховых аперацый вайны»

• 30.11.2025, 15:56

Z-прапагандысты былі вымушаныя прызнаць поспех Украіны ў Наварасійску.

Расійскі Z-канал «Марская магутнасць дзяржавы», які часта публікуе звесткі пра стан флоту краіны-агрэсара, апублікаваў кадры атакі ўкраінскіх БПЛА на порт Наварасійска, піша «Дыялог.UA».

Ён назваў аперацыю адной з найбольш эфектыўных за ўвесь перыяд поўнамаштабнай вайны. У самой РФ пра атаку мала хто ведае. Улады Расіі і дзяржаўныя СМІ амаль нічога пра яе не расказалі расіянам, хоць наступствы больш чым сур'ёзныя.

«Два дні таму ў Наварасійску Украіна правяла адну з самых паспяховых аперацый за ўвесь час вайны. Але не здзіўлюся, што многія пра яе нават не чулі, яна не была такой гучнай, як «Павуціна», — напісаў канал.

Паводле яго дадзеных, у выніку ўдару быў паражаны комплекс СПА «С-400». У выніку дэтанацыі знішчаны чатыры пускавыя ўстаноўкі з сямі, а разам з імі страчаны і два радыёлакацыйныя комплексы — 96Н6 і 92Н6.

Пасля падаўлення СПА па тэрыторыі нанеслі ракетны ўдар комплексам «Нептун», мэтай стаў нафтавы тэрмінал «Шэсхарыс». Гэты аб'ект з'яўляецца адным з ключавых марскіх вузлоў пастаўкі паліва для Расіі. Атака стала асабліва балючай для эканомікі краіны-агрэсара.

Вядома, што экспарт нафтапрадуктаў праз тэрмінал быў часова прыпынены. Для Расіі гэта азначае кароткатэрміновую страту каля 20 працэнтаў ад агульнага экспарту нафтапрадуктаў і прыблізна 15 працэнтаў экспарту нафты. На сусветным узроўні гэта складае каля 2 працэнтаў ад усяго гандлю нафтай, што робіць удар стратэгічна значным.