Знішчальнік F-16 перахапіў самалёт каля рэзідэнцыі Трампа

• 30.11.2025, 14:27

Прэзідэнт ЗША знаходзіўся там з 25 лістапада.

Ваенна-паветраныя сілы ЗША паднялі ў неба знішчальнік F-16 для перахопу грамадзянскага самалёта, які наблізіўся да рэзідэнцыі прэзідэнта ЗША Дональда Трампа у Фларыдзе.

Пра гэта паведамляе Камандаванне паветрана-касмічнай абароны Паўночнай Амерыкі (NORAD).

Адзначаецца, што неназваны грамадзянскі самалёт парушыў часова абмежаваную для палётаў паветраную прастору.

«Паветранае судна было бяспечна выведзена з гэтай зоны», — гаворыцца ў заяве.

Паведамляецца, што інцыдэнт адбыўся прыблізна а 02:20 паводле мінскага часу 30 лістапада.

Адзначаецца, што рэзідэнцыя Дональда Трампа знаходзіцца ў горадзе Палм-Біч. Ён прыбыў туды 25 лістапада. У Вашынгтон Трамп павінен вярнуцца 30 лістапада.

Усяго з моманту інаўгурацыі Трампа ў студзені 2025 года NORAD адрэагаваў на больш за 40 парушэнняў зоны часовага абмежавання палётаў у раёне Вэст-Палм-Біч.