«Дамофон» абышоўся мінчанцы ў гіганцкую суму

• 3.11.2025, 21:05

Як так выйшла.

У Мінску актывізаваліся махляры. Яны прыдумваюць розныя вытанчаныя схемы, на якія зноў і зноў трапляюцца даверлівыя беларусы.

Гэтым разам падставай для падману стала замена дамофона. Жанчыне прапанавалі абнавіць устаноўку. Яна згадзілася і страціла прыстойную суму грошай.

Падрабязнасці, як гэта адбылося, прыводзіць «Міліцыя Мінска».

Махляры абманулі мінчанку на суму звыш 60 тыс. рублёў.

Справа была так. Невядомыя патэлефанавалі і паведамілі, што будуць мяняць дамофон у пад’ездзе. Жанчына ім паверыла і перадала персанальныя даныя і код доступу, які прыйшоў ёй на тэлефон.

Праз некаторы час з ёй ужо ў мэсэнджары звязаліся нібыта прадстаўнікі праваахоўных органаў. «Супрацоўнікі» заявілі: на яе імя аформілі крэдыты, даныя мінчанкі выкарыстоўваюцца для незаконных фінансавых аперацый.

Жанчыну запалохалі: нібыта ёй пагражае крымінальная справа, а таксама вобшук у кватэры.

Але выхад ёсць, запэўнілі «праваахоўнікі», – трэба задэклараваць наяўныя зберажэнні. Для гэтага мінчанка пералічыла махлярам велізарную суму грошай.

Пасля з жанчынай на сувязь ніхто не выйшаў.

Яна зразумела, што яе падманулі, і звярнулася ў міліцыю. Узбуджана крымінальная справа, падазраваных вышукваюць.