Румынія набыла 18 F-16 за 1 еўра ў Нідэрландаў

• 3.11.2025, 20:52

На знішчальніках будуць навучацца ўкраінскія лётчыкі.

Румынія набыла ў Нідэрландаў 18 самалётаў F-16 за 1 еўра. Пра гэта паведаміў міністр абароны Румыніі Ёнуц Моштяну ў Facebook.

Кантракт таксама прадугледжвае набыццё суправаджальнага абсталявання. Самалёты прызначаныя для выкарыстання ў Еўрапейскім навучальным цэнтры F-16 у Фетешце.

«18 самалётаў будуць выкарыстоўвацца выключна для навучання і інструктажу, а частку месцаў у праграме выдзеляць для навучання ўкраінскіх лётчыкаў. Набыццё ажыццяўляецца па сімвалічнай цане 1 еўра. Гэта разумная інвестыцыя ў навучанне, супрацоўніцтва і будучыню», – заявіў міністр.

У Міністэрстве абароны ўдакладнілі, што кошт набыцця 18 самалётаў F-16, згодна з кантрактам, складае 1 еўра без ПДВ, але да сумы дадаецца 21 млн еўра ПДВ, разлічанага на падставе заяўленага кошту тавараў у памеры 100 млн еўра.