У Беларусі заўважылі незвычайнага дразда

• 3.11.2025, 20:08

Новы від?

У Полацкім раёне зафіксаваныя дзве птушкі, вельмі падобныя на бурага дразда (Turdus eunomus). Як паведамляе тэлеграм-канал «Дзікая прырода побач», з дапамогай фотапасткі перанатых зняў фотаанімаліст і відэаблогер Аляксандр Эрдман.

Удакладняецца, што буры дразд вонкава падобны да белаброўніка, які водзіцца ў Беларусі, але буйнейшы.

– Від распаўсюджаны ў лясатундры Сібіры, а зімуе звычайна ў Паўднёвай Азіі, – гаворыцца ў паведамленні. – Часам сібірскія дразды могуць залятаць увосень у Еўропу.

Беларускай арніта-фаўністычнай камісіі (БАФК) належыць вырашыць, ці стане гэтая птушка 345-м відам у спісе птушак Беларусі. Нагадаем, 344-ы пункт у ім з’явіўся ў кастрычніку, калі ў краіне выявіўся белашый дразд, які гняздуецца ў Скандынавіі, а зімуе ў Міжземнамор’і. Яго таксама заўважылі ў Віцебскай вобласці.