У цэнтры Рыма абрынулася гістарычная вежа Конці

• 3.11.2025, 17:35

Пад заваламі шукаюць людзей.

Частка вежы Торэ-дэі-Конці XII стагоддзя на плошчы Ларга Каррада Рыччы абрынулася падчас рэстаўрацыі. Чацвёра рабочых апынуліся заблакаваныя на верхняй частцы будынка, ратавальнікі пачалі пошукі людзей пад абломкамі. Праз паўтары гадзіны адбыўся другі абвал, праваахоўцам давялося пашырыць зону ачаплення, паведамляе Corriere della Sera.

На гэты момант вядома пра чатырох пацярпелых.

З-пад завалаў ратавальнікі дасталі трох рабочых. Двум аказалі дапамогу на месцы, 64‑гадовага мужчыну даставілі ў бальніцу ў цяжкім стане. Яшчэ адзін рабочы, які, як мяркуецца, знаходзіцца пад заваламі, падае прыкметы жыцця.

Рух на прылеглых вуліцах перакрыты. Пракуратура Рыма пачала расследаванне. Сярод магчымых прычын абвалу разглядаецца разбурэнне апорных канструкцый.