ЗША аднаўляюць закінутую базу на Пуэрта-Рыка

• 3.11.2025, 10:22

Журналісты расказалі, што гэта азначае.

Армія ЗША пачала мадэрнізацыю закрытай 20 гадоў таму ваенна-марскай базы «Рузвельт-Роудс» у Карыбскім рэгіёне. Пра гэта паведамляе Reuters са спасылкай на спадарожнікавыя здымкі. На кадрах бачна, што рабочыя расчышчаюць і нанова асфальтуюць руляжныя дарожкі, якія вядуць да ўзлётна-пасадачнай паласы.

Адначасова ЗША будуюць і абнаўляюць аб'екты на тэрыторыях грамадзянскіх аэрапортаў Пуэрта-Рыка і вострава Сэнт-Круа, якія знаходзяцца прыблізна за 800 кіламетраў ад Венесуэлы.

Паводле звестак Reuters, гэтыя работы могуць сведчыць пра падрыхтоўку да магчымых аперацый у Венесуэле. Тры прадстаўнікі ўзброеных сіл ЗША і тры марскія эксперты паведамілі агенцтву, што дзеянні Вашынгтона, верагодна, накіраваныя на тое, каб аказаць ціск на венесуэльскае кіраўніцтва і запалохаць рэжым Нікаласа Мадура.

Reuters адзначае, што гэта найбольшае ваеннае ўзмацненне ЗША ў рэгіёне з часоў аперацыі «Падтрымка дэмакратыі» у 1994 годзе. Тады Вашынгтон накіраваў два авіяносцы і больш за 20 тысяч вайскоўцаў на Гаіці для вяртання да ўлады законнага прэзідэнта Жана-Бертрана Арыстыда.

З пачатку верасня ЗША праводзяць аперацыі супраць суднаў у Карыбскім моры, якія, паводле даных амерыканскай разведкі, перавозяць наркотыкі. Прэзідэнт ЗША Дональд Трамп абвінавачвае Мадура ў садзейнічанні сусветнаму наркатрафіку.

Нягледзячы на публічныя заявы Трампа пра тое, што ён не плануе ваеннага нападу на Венесуэлу, СМІ сцвярджаюць, што Белы дом ужо ўзгадніў адпаведныя планы аперацыі.