У Мінску гарэла Нацыянальная школа прыгажосці

• 29.11.2025, 15:28

Пажар здарыўся ў адным з кабінетаў.

У Нацыянальнай школе прыгажосці ў Мінску ўдзень 29 лістапада здарыўся пажар. Ратавальнікі ліквідавалі ўзгаранне, паведамілі ў МНС.

Пра пажар у Нацыянальнай школе прыгажосці на вуліцы Мельнікайте, 4 у Мінску стала вядома ўдзень — нехта патэлефанаваў у МНС.

Калі ратавальнікі прыбылі, у адным з кабінетаў гарэла маёмасць на плошчы 7 кв. м.

«У сувязі з моцным задымленнем работнікі МНС эвакуявалі 47 чалавек, якія знаходзіліся ў будынку. Ніхто не пацярпеў», — паведамілі ў МНС.

Прычыны і абставіны здарэння высвятляюцца. На месцы працавалі восем адзінак тэхнікі ратавальнікаў.