У Іспаніі 101-гадовая пенсіянерка штодня трэніруецца з гантэлямі ў трэнажорнай зале

• 28.11.2025, 23:17

Па 2 гадзіны.

У Іспаніі 101-гадовая пенсіянерка штодня па дзве гадзіны трэніруецца з гантэлямі ў трэнажорнай зале, піша Daily Mail.

Іняксі Ласа з іспанскага Бісаіна перажыла Другую сусветную вайну, рак малочнай залозы, два пераломы сцягна, аперацыю на вачах і перахварэла на COVID-19 у 98 гадоў. Нягледзячы на астэаартрыт, яна не прапускае ніводнага дня заняткаў.

У трэнажорную залу Ласа ўпершыню прыйшла ў 94 гады — пачала займацца з гантэлямі, каб умацаваць цягліцы і косткі і запаволіць развіццё дэменцыі. Аднак, паводле яе слоў, актыўны лад жыцця суправаджаў яе і раней: прагулкі, велатрэнажор, ранішнія выхады з дому нават узімку.

«Сілавыя трэніроўкі прымушаюць мяне адчуваць сябе жывой, яны карысныя і для цела, і для розуму», — адзначае Ласа.

Не меншую ролю ў сваім даўгалецці яна адводзіць харчаванню. Іспанка прытрымліваецца міжземнаморскай дыеты, багатай на гародніну, садавіну і карысныя тлушчы. Аліўкавы алей яна называе адным з ключавых прадуктаў.

«Жыццё — гэта барацьба, і трэба працягваць змагацца. Галоўнае — мець мэту і ніколі не здавацца», — адзначае пенсіянерка.