Кітайскія кампаніі выціскаюць расійскіх вытворцаў з ключавых рынкаў

• 28.11.2025, 14:22

З'явіліся даныя ўкраінскай разведкі.

Расійская эканоміка сутыкаецца з узрастаючым ціскам з боку «сяброўскіх» краін, якія хутка займаюць нішы, што застаюцца пустымі з-за інвестыцыйнай паўзы.

Пра гэта паведамляе прэс-служба Службы знешняй разведкі Украіны.

Паводле інфармацыі СЗР, высокая ключавая стаўка, неэфектыўная манетарная палітыка і скарачэнне бюджэтнага імпульсу фактычна паралізуюць унутраных вытворцаў.

Фармальныя паказчыкі інвестыцый у асноўны капітал выглядаюць стабільнымі, але гэта — толькі адлюстраванне старых актываў, у той час як рэальнае падзенне дасягае 1,5 %.

Заўважваецца, што экспартныя даходы ўжо скараціліся на 20 %, а рост падатковай нагрузкі, уключаючы ПДВ, дадаткова абмяжоўвае магчымасці бізнесу.

Прамыслоўцы наўпрост указваюць на запаволенне зніжэння ключавой стаўкі і высокі кошт крэдытаў як на галоўныя бар'еры для развіцця. Як вынік — рынак адкрываецца для кітайскіх пастаўшчыкоў абсталявання і прадукцыі, якія без значных укладанняў атрымліваюць кантроль над сегментамі, што страчваюць расійскія кампаніі.

Найбольш паказальны — рынак цяжкіх грузавікоў. За студзень—кастрычнік 2025 года продажы аўтамабіляў масай больш за 14 тон упалі на 54 %, а сегмент магістральных цягачоў — на 71 %.

Усяго зарэгістравана 37,9 тыс. цяжкіх аўтамабіляў, што на 57 % менш, чым летась.

Нягледзячы на фармальнае лідарства «КамАЗа» з доляй 29,5 %, кітайскія Sitrak (16,3 %), Shacman (10,8 %) і FAW (9 %) фактычна выціскаюць яго з рынку. Дадае ціску і беларускі «МАЗ» з 7,2 %.

«Расійскі вытворца асуджаны на далейшае выцісканне з ключавых сегментаў, а аднавіць страчаныя пазіцыі ва ўмовах агрэсіўнай экспансіі «сяброўскіх» канкурэнтаў фактычна немагчыма», — адзначылі ў разведцы.