Попыт на жыллё ў Мінску абрынуўся за месяц

• 27.11.2025, 23:16

На тое ёсць некалькі прычын.

Лістапад рызыкуе паставіць антырэкорд па продажах кватэр у Мінску. З чым звязана рэзкае падзенне, распавяла незалежная экспертка па нерухомасці ў тэлеграм-канале «Літоўская пра жыллё».

Паводле дадзеных Нацыянальнага кадастравага агенцтва на 26 лістапада 2025 года, за няпоўны месяц было заключана толькі 929 здзелак па куплі-продажы сталічных кватэр.

Хаця яшчэ ў кастрычніку іх колькасць дасягнула 1408. Гэта рэкорднае значэнне 2025 года. Тут жа прыкметнае падзенне попыту больш чым на траціну.

Экспертка прагназуе, што наўрад ці ў снежні здзелак будзе значна больш.

Чаму людзі перасталі купляць.

Літоўская бачыць чатыры прычыны такога рэзкага падзення попыту. Перш за ўсё — цэны. Кошт квадратнага метра пастаянна расце.

«Людзі ўжо проста не разумеюць, як кватэры могуць каштаваць такія грошы. І не пацягваюць», — лічыць экспертка.

Сваю ролю адыгралі і дарагія крэдыты на другаснае жыллё. Пры сярэднім заробку банк зможа пакрыць ад 20 да 40% кошту нерухомасці, што не надта дапаможа.

Таксама мінчукі значна часцей звяртаюць увагу на новабудовы. Пакуль іх частка ў агульных продажах невялікая, але даступныя крэдыты прымушаюць усё больш задумвацца пра такое жыллё.

З не відавочных фактараў — сыход «хатніх інвестараў» з другаснага рынку. Ідзе гаворка пра людзей, якія спецыяльна куплялі кватэры для наступнай здачы ў арэнду.

Паводле слоў Літоўскай, даходнасць ад такога жылля, набытага на піку, нізкая як ніколі.