У снежні ў беларусаў будуць чатыры выходныя запар

• 27.11.2025, 10:10

Але адзін з іх давядзецца адпрацаваць.

Снежань 2025-га рыхтуе жыхарам Беларусі маленькі, але вельмі прыемны падарунак — чатыры выходныя дні запар. Але, як гэта звычайна бывае, бясплатным ён усё ж такі не будзе — адзін з дзён давядзецца адпрацаваць у суботу. Падрабязнасці расказалі ў Мінпрацы.

Калі адпачываем?

У чацвер, 25 снежня, краіна адзначае каталіцкае Божае Нараджэнне — афіцыйны выходны. А каб святочны настрой не заканчваўся занадта рана, пятніца, 26 снежня, таксама стане непрацоўнай.

Суботу і нядзелю — па традыцыі — адпачываем.

У выніку: 25, 26, 27 і 28 снежня — выходныя дні.

Але адзін з іх давядзецца адпрацаваць: пятніцу, 26 снежня, перанеслі на суботу, 20 снежня.

Што, калі ў гэты перыяд вы ў адпачынку?

Калі на 26 снежня прыпадае адпачынак, то 20 снежня можна спакойна адпачываць — працоўную суботу ў гэтым выпадку «не залічваюць».

А вось калі чалавек у камандзіроўцы або на навучанні, то субота, 20 снежня, аўтаматычна ператвараецца ў працоўны дзень.

А што там з Новым годам?

2026 год таксама пачнецца з доўгіх выходных. 1 і 2 студзеня прыпадаюць на чацвер і пятніцу, адпаведна, нас зноў чакаюць чатыры выходныя запар.

Першы працоўны тыдзень будзе кароткі: 7 студзеня, Праваслаўнае Раство, — выходны.