Porsche дадасць «віртуальныя перадачы» ў будучыя электракары

• 26.11.2025, 18:40

Нямецкі аўтавытворца натхніўся Hyundai Ioniq 5.

Нават Porsche прызнае, што электрычны Hyundai Ioniq 5 N атрымаўся ўражлівым. Адзін з кіраўнікоў нямецкага брэнда распавёў, што тэст-драйв карэйскага хэтчбэка стаў «адкрыццём» для інжынераў. Асабліва ім спадабаліся штучныя гукі матора і імітацыя пераключэння перадач — фірменныя «фішкі» спартыўнай версіі N, піша Motor1 (пераклад — сайт Charter97.org).

Паводле яго слоў, менавіта гэтыя элементы натхнілі Porsche на падобныя рашэнні для будучых электрычных Boxster і Cayman. Вадзіцелі змогуць уключаць або выключаць штучны «плоскі шасціцыліндровы» гук і віртуальныя перадачы паводле свайго жадання.

Эфектыўнасць такіх сістэм немцаў пераканала не адразу: нават кіраўнік падраздзялення, адказнага за спартыўныя мадэлі, спачатку адмаўляўся сядаць у Ioniq 5 N, заяўляючы, што яму «нецікавыя электрамабілі». Аднак пасля кароткай паездкі ён змяніў меркаванне, асабліва ацаніўшы рэжым максімальнай магутнасці, які актывуецца кнопкай на рулі. Гэты рэжым на 10 секунд дазваляе паскарацца да 100 км/г за 3,2 секунды — пры ўмове, што зарад акумулятара вышэй за 30%.

Электрычныя Porsche 718 з'явяцца не раней за 2027 год. Хаця першапачаткова планавалі цалкам перайсці на электрацягу, цяпер у лінейцы застануцца версіі з рухавіком унутранага згарання — але толькі самыя дарагія.

У кампаніі прызнаюць, што новыя электрычныя Boxster і Cayman будуць цяжэйшымі за цяперашнія мадэлі, аднак абяцаюць, што яны ўсё роўна застануцца «вельмі лёгкімі» па мерках электракараў.