У Мінску завяршыўся мантаж галоўнай навагодняй ёлкі

• 26.11.2025, 17:55

Як яна выглядае?

У Мінску, на Кастрычніцкай плошчы, завершылася ўстаноўка галоўнай ёлкі краіны. Сімвал Новага года ўжо цалкам гатовы да надыходзячых святаў: на вяршыні — зорка, на галінках — гірлянды і цацкі ў класічнай каляровай гаме: ёсць белыя, сінія і залацістыя шарыкі, піша Onlíner.

Мантаж пачаўся 13 лістапада. Працэс, як звычайна, аказаўся даволі працаёмкім: спачатку збіралі масіўны каркас — амаль 10 тон металу, затым падымалі «ствал», нацягвалі тросавыя сістэмы і мацавалі каля 30 паясоў, да якіх мацуюцца штучныя лапкі. Усяго іх — да чатырох тысяч, і толькі на гэтую частку работ ідзе два дні.

Яшчэ некалькі дзён спатрэбілася на развешванне гірлянд і іншых дэкаратыўных элементаў.

Вышыня ёлкі засталася ранейшай — каля 30 метраў. У гэтым годзе святочны ансамбль дапоўняць і новыя інсталяцыі: на плошчы з'явяцца дэкаратыўныя аркі, прысвечаныя месяцам і парам года. Праўда, іх яшчэ не паспелі да канца змантаваць.