У Грэцыі запалілі алімпійскі агонь для зімовых гульняў

• 26.11.2025, 15:09

Алімпіяда пройдзе ў Італіі.

Алімпійскі агонь для зімовых гульняў у Італіі быў запалены ў Алімпіі. Пра гэта піша Il Giornale.

Паведамляецца, што агонь запаліла актрыса Марыя Міна, якая выконвала ролю вярхоўнай жрыцы ў суправаджэнні весталак у стылізаваных старажытнагрэчаскіх строях. З-за дрэннага надвор'я ў Грэцыі цырымонія адкрыцця праходзіла ў Археалагічным музеі. На ёй прысутнічалі прэзідэнт МАК Кірсці Ковентры і вялікая італьянская дэлегацыя, у склад якой уваходзілі міністр спорту і моладзі краіны Андрэа Абодзі і прэзідэнт Coni Лучана Буонфільё.

За дзевяць дзён больш як 450 факеланосцаў пранясуць агонь на працягу больш як 2000 км у сямі рэгіёнах краіны. Шлях завершыцца 4 снежня ў Афінах, пасля чаго алімпійскі агонь накіруецца ў Італію. Яго падарожжа пачнецца ў Рыме 6 снежня і працягнецца 60 дзён, завяршыўшыся вечарам 6 лютага цырымоніяй адкрыцця зімовых алімпійскіх гульняў на стадыёне «Сан-Сіро» ў Мілане. Зімовая Алімпіяда 2026 г. працягнецца да 22 лютага.