Кевін Спэйсі адказаў на чуткі пра «бяздомнасць»

• 24.11.2025, 20:42

Акцёр атрымаў хвалю падтрымкі.

Распаўсюджаныя ў СМІ загалоўкі пра тое, што вядомы амерыканскі акцёр Кевін Спэйсі нібыта стаў бяздомным, выклікалі нечаканую хвалю падтрымкі: тысячы людзей напісалі акцёру і прапанавалі яму месца для пражывання. У адказ Спэйсі запісаў відэазварот, у якім растлумачыў, што сітуацыю няправільна падавалі журналісты, піша korrespondent.net.

Раней акцёр даў інтэрв’ю брытанскаму The Telegraph, дзе распавёў, што апошнім часам шмат падарожнічае і жыве ў гатэлях і Airbnb, працуючы лаўндж-спеваком. Матэрыял атрымаў гучны загаловак «Бяздомны, адменены і спявае на Кіпры», з-за чаго ў медыяпрасторы ўзніклі чуткі пра яго «цяжкае становішча».

Спэйсі растлумачыў, што яго словы пра «жыццё на чамаданах» датычыліся не беднасці, а стылю жыцця, які ён ужо вёў на пачатку кар’еры.

«Я літаральна жыву ў гатэлях, езджу туды, дзе ёсць праца. У мяне няма пастаяннага дома — і менавіта гэта я спрабаваў патлумачыць», — сказаў акцёр у інтэрв’ю.

Калі ж у сацсетках пачалі распаўсюджвацца сенсацыйныя загалоўкі пра «бяздомнасць», Спэйсі апублікаваў відэа ў Instagram, звяртаючыся да ўсіх, хто напісаў яму з прапановамі прытулку:

«Я шчыра крануты вашай шчодрасцю. Але было б несумленна дазволіць вам думаць, што я сапраўды бяздомны, як гэта падаецца ў загалоўках».

Акцёр дадаў, што не імкнуўся параўноўваць сябе з людзьмі, якія сапраўды апынуліся на вуліцы або жывуць у машынах: «Ёсць вельмі шмат людзей, якія перажываюць сапраўдныя фінансавыя цяжкасці. Я за іх вельмі перажываю. Але з артыкула відаць, што я не адзін з іх».