Жыхарка Гродна выйграла спрэчку з наймальнікам пра ўмовы працы

• 24.11.2025, 16:09

Яе прымушалі падымаць цяжары.

Жыхарка Гродна працавала на прыватным прадпрыемстве і рэгулярна падымала цяжкія скрыні. Унутраная камісія пацвердзіла парушэнні: замест дапушчальных 7 кг жанчына падымала больш за 11.

Як патлумачылі ў абласной арганізацыі Беларускага прафсаюза работнікаў аховы здароўя, наймальнік не ўлічыў пералік забароненых для жанчын цяжкіх і шкодных работ. У ім, між іншым, ёсць работы, звязаныя з пад'ёмам і перамяшчэннем цяжараў звыш нормаў, піша 1prof.by.

Работніца запатрабавала звольніць яе па арт. 41 Працоўнага кодэкса і выплаціць кампенсацыю ў памеры трох заробкаў. Такая гарантыя прадугледжана пры датэрміновым скасаванні кантракта ў сувязі з парушэннем наймальнікам заканадаўства аб працы.

Але кіраўнік не спяшаўся ісці насустрач, і работніца звярнулася ў прафсаюз. Там патлумачылі, што супрацоўніца мела поўнае права звольніцца на дадзенай падставе і атрымаць кампенсацыю: наймальнік парушыў п. 5 арт. 55 Працоўнага кодэкса, згодна з якім наймальнік абавязаны забяспечваць на кожным рабочым месцы ўмовы, што адпавядаюць патрабаванням аховы працы.

Пасля ўмяшання прафсаюза кантракт скасавалі датэрмінова і выплацілі кампенсацыю ў памеры трох заробкаў.