Навукоўцы высветлілі, што мох выжыў дзевяць месяцаў у вакууме космасу

• 21.11.2025, 16:46

Унікальныя ўласцівасці.

Даследчыкі высветлілі, што мох можа вытрымліваць суровыя ўмовы космасу. Яго споры правялі 9 месяцаў на вонкавым баку Міжнароднай касмічнай станцыі (МКС), і амаль усе выжылі, піша New Voice.

«Мы чакалі амаль нулявой выжывальнасці, але вынік аказаўся процілеглым: большасць спор выжыла», — кажа біёлаг Тамомічы Фудзіта з Універсітэта Хакайда. «Мы былі сапраўды здзіўленыя такой неверагоднай устойлівасцю гэтых драбнюткіх раслінных клетак».

Даследчыкі ўзялі споры звычайнага моху Physcomitrium patens, які часта выкарыстоўваецца ў навуцы як мадэльная расліна з-за простай будовы і цалкам расшыфраванага геному. Споры замацавалі звонку МКС, а пасля вяртання на Зямлю больш за 80% з іх змаглі прарасці.

«Большасць жывых арганізмаў, уключаючы людзей, не выжываюць нават кароткі час у вакууме космасу. Але споры моху захавалі жыццяздольнасць пасля дзевяці месяцаў прамога ўздзеяння космасу», — тлумачыць Фудзіта.

Такія ўласцівасці моху дапамаглі яго продкам — мхам, пячоначнікам і рагалістнікам — перайсці з воднага асяроддзя на сушу каля 500 мільёнаў гадоў таму. Гэтыя першыя наземныя расліны здабывалі пажыўныя рэчывы з камянёў, фармуючы глебы, на якіх пазней развівалася жыццё.