ШІ-Ньютан рыхтуе новыя адкрыцці ў фізіцы

• 21.11.2025, 11:49

Навукоўцы пазнаёмілі нейрасетку з асноўнымі законамі

Мадэлі ШІ ўмеюць працаваць з вялікімі данымі і выяўляць заканамернасці, якія людзі могуць выпусціць з-пад увагі. Разумеючы гэта, кітайскія даследчыкі распрацавалі сістэму AI-Newton («ШІ-Ньютан»): пасля «вывучэння» эксперыментальных даных яна зможа рабіць уласныя «адкрыцці», піша «Нож».

Сааўтар распрацоўкі з Пекінскага ўніверсітэта Янь-Цін Ма патлумачыў, што мадэль не навучаецца стыхійна, а паступова фармуе базу ведаў пра вядомыя законы і канцэпцыі. Паводле фізіка, такі падыход да «навучання» AI-Newton імітуе рэальны навуковы працэс.

Навукоўцы паведамілі, што AI-Newton навучылася шукаць найлепшае матэматычнае раўнанне для апісання фізічных з'яў. Простымі словамі, мадэль запраграмаваная на пошук новых тлумачэнняў чаго-небудзь без умяшання з боку чалавека.

Каб праверыць навыкі «ШІ-Ньютана», каманда пратэставала мадэль. Даследчыкі паказалі праграме вынікі 46 эксперыментаў з розных раздзелаў фізікі.

Спачатку AI-Newton прадставілі даныя пра становішча мяча ў пэўны момант часу. Пасля яе папрасілі вывесці матэматычнае раўнанне, якое тлумачыць узаемасувязь паміж двума зменнымі: часам і становішчам у прасторы. У выніку «Ньютан» здолеў вывесці раўнанне для хуткасці і захаваў новыя веды для выканання наступнага набору задач.

Верагодна, у недалёкай будучыні аўтары распрацоўкі падзеляцца першымі свежымі адкрыццямі свайго «калегі».